නවතම අත්දැකීමක්

ඔයාල සමහරක් අයට මතක ඇති මගේ චුටි පුතා UK වල ඉගෙන ගන්න බව. මම අද ඔයාලත් එක්ක බෙදා ගන්න හිතුව මගේ පුතාට ලැබුන අලුත් අත්දැකීමක් ගැන. මේ සිද්දිය වුනේ මාර්තු මාසේ 9 සහ 10 දින දෙක තුල. එය උදේ නැගිටිනකොට එයාගේ කාමරේ විදුරු ජනේලෙන් පේනවලු ලොකු කැට වගේ වැස්සක්. ඉතින් මෙයා නැගිටල ජනේලෙ ලගට ගියාලු මොකක්ද කියල බලන්න. එය දැක්ක දෙයින් හොදටම පුදුම වුණාලු. කලින් දා රෑ ඉදල එයා ඉන්න ප්‍රදේශයට හිම වැටෙනවලු. එයා ජනේලේ ලගට ගියාම අනෙත් ගෙදර පහතට තියන වහලය උඩ හිම පිරිලා තිබුනලු. පාර දිගේ සහ පාරේ නවත්වල තියන කාර් උඩ ඔය වගේ හැම තැනකම හිමලු. පුතා හනිකට එළියට ගිහින් අපිට video call එකක් අරන් හිම වැටෙන හැටි අපිටත් පෙන්නුවා. අපිත් ඉතින් ඔය දැක්කමනේ. ලොකු කැට වශයෙන් තමා වැස්ස වහිනවා වගේ වහින්නේ. බලන්න හරිම ලස්සනයි.

පුතා කියපු විදියට ක්ෂණික කාල ගුණ විපර්යාසයක් නිසා තමා මේ විදියට හිම වැටෙන්න හේතු වෙලා තියෙන්නේ. දෙවෙනි දවසෙත් එයා campus එකට ඇවිදන් ගියේ හිම වැස්සේම තමා. හිම වහිනවා කියල එයාල කුඩ පාවිච්චි කරන්නේ නැහැ. ඒ වෙනුවට හුඩ් එක තියන කබා ඇද ගෙන තමා යන්නේ. එදත් එයා campus එකට යනකම්ම video call එකක් අරන් හිම වැස්සේ අපිත් එක්කම තමා ගියේ. කළු කබායට වැටෙන හිම කැට ක්ෂණයකින් දියවෙලා යන හැටි බලන්න ආශයි. තණ පිට්ටනි උඩ තිබුණ හිම කැට මට මතක් කලේ අපේ රටේ පාන්දරට පින්න වැටුනම දිලිසෙන විදිය. තණ පිට්ටනි උඩ සුදු පාට පුංචි මල් පිපිලා වගේ බලන්න ලස්සනයි.

පුතා පිටේ එල්ලන් ගිය බෑග් එක හොදටම තෙමිලා. මම ඇහුව දැන් වේලා ගන්නේ කොහොමද කියලා. ප්‍රශ්නයක් නැහැ පොඩි වෙලාවක් යද්දී campus එක ඇතුලේදී වේලෙනවා කීවා. ඉතින් එයාටත් නව අත්දැකීමක් වුන හිම වැස්ස, අපිටත් බලා ගන්න සැලැස්සුවේ එහෙමයි.

කොහොමත් ඒ දවස් දෙකේ එංගලන්තේ පුරා තදට හිම වැටිලා තිබුන. මගේ නංගිගේ දුව ගේ පවුලම ඉන්නේ walles වල. එයාල කියනවා එයාලගේ පැත්තේ පාසල් සහ සියලු ආයතන පවා වසා දැම්මලු හිම වැස්ස නිසා. එහෙට ටිකක් තදට හිම වැටිලා තියන බව පෙනුන එයාලගේ කතාවෙන්.

මේක බලා පොරොත්තු නොවුන කාලගුණ විපර්යාසයක් කියල තමා ඒ රට දැනුම් දීල තිබුනේ. හිම වැටිලා තියෙන්නේ බලාපොරොත්තු නොවුන කාලයක.

ඉතින් පුතා විසින් එවල තිබ්බ photo ටිකක් ඔයාල එක්ක බෙදා ගන්න මම තිරණය කලා ඔයාලටත් දැක ගන්න. video වගයකුත් තියනවා ඒත් ඒවා දාන්න විදියක් නෑ මට youtube චැනලයක් නැති නිසා.

ලිපිය කියවල සහ ෆොටෝ දැකල ඔයාලටත් හිම වැස්ස ගැන දැනීමක් මෙන්ම සතුටකුත් ලැබෙන්න ඇති කියල මම හිතනවා. හැමෝටම සුබ දවසක්.

ස්තුතියි.