Another American Tragedy by John Collier
කම්මැලිකම යන්න කියවන්න පොතක් හොයද්දී ප්‍රවීන් මට දුන්නා මෙන්න මේ පොත, ශ්‍රේෂ්ඨ ලේඛකයන්ගේ විශිෂ්ට කෙටිකතා - 3. මෙය ලොව විසූ ශ්‍රේෂ්ඨ ලේඛකයන් විසි හය දෙනෙකුගේ කෙටි කතා 26 කින් සමන්විත වෙනවා. මේ පොත චන්දන මෙන්ඩිස් මහතාගේ පරිවර්තනයක්.
ප්‍රවීන් මට ලකුණු කරලා දුන්නා මේකෙ එයා කැමති කතන්දර කීපයක්. ඒවයෙන් එකක් තමයි මේ 'Another American Tragedy' එහෙමත් නැත්නම් 'තවත් ඇමරිකානු ඛේදවාචකයක්' කියලා කියන්නේ. මේක රචනා කරලා තියෙන්නේ 1940 දී ජෝන් කොලිය(ර්) විසින්.
මෙම කතාවෙන් කියැවෙන්නේ දරිද්‍රතාවයෙන් පෙළෙන තම ජීවිතයෙන් මිදීමට මංමුලා සහගතව සිටින ජෝන් කියන තරුණයාගේ කතාව. ඔහුගේ බීමත්කම හා සූදුව දෙමව්පියන්ගෙන් හිමි වූ දේපළ සියල්ල අහිමි වීමට හේතුවයි. ඔහුගේ ධනවත් මාමා මිය යමින් ඉන්න බව දැනගත් ජෝන් මාමාගේ ධනය ලබා ගන්න එය අවස්ථාවක් කරගන්නවා. ජෝන් එම ධනය උරුම කර ගැනීම සඳහා තම මාමාව ඝාතනය කිරීමට තීරණය කරනවා. ජෝන්ගේ සැලැස්ම මුලින් සුමටව සිද්ධ වෙනවා. එයා තමන්ගේ වයසක මාමා වගේ පෙනුම වෙනස් කරගන්න අදහසින් කටේ දත් සියල්ලමත් ගලවා ඉවත් කරනවා. කොහොමවුණත්, ජෝන්ගේ වාසනාව ඉක්මනින් ඉවර වෙනවා. මාමා දේපළ ලියලා තියෙන්නේ ඔහුගේ වෛද්‍යවරයාට. ජෝන් මාමාව මරලා අන්තිම කැමති පත්‍රේ වෙනස් කරන්න යද්දී වෛද්‍යවරයා කරන්නෙ ජෝන්ව මරා දමන එක.
මේ කෙටිකතාව අභිලාෂයේ අන්තරායන් පිළිබඳ අනතුරු ඇඟවීමේ කතාවක්. ජෝන් යනු ධනයට හා සාර්ථකත්වයට ඇති ආශාව නිසා අන්ධ වූ තරුණයෙක්. මිනීමැරුමක් කළත් තම අරමුණු ඉටුකර ගැනීමට අවශ්‍ය ඕනෑම දෙයක් කිරීමට ඔහු සූදානම්. අවසානයේදී, ජෝන්ගේ අභිලාෂය ඔහුගේම විනාශයට හේතු වුණා. මුලින්ම අපි අපේ අභිලාෂය එහෙමත් නැත්නම් අවසානයේ බලාපොරොත්තු වෙන දේ තේරුම් ගන්න ඕන. ඒ වෙනුවෙන් කිසිම වෙලාවක දුර්වල තීරණ ගැනීම් නොකළ යුතුයි. ඒ වගේම නිතරම අපේ ක්‍රියා වල ප්‍රතිවිපාක ගැන හිතන්න ඕන. කෑදරකම සහ දැඩි අභිලාෂය විනාශයට හේතු විය හැකි බව මෙම කෙටිකතාව මතක් කරලා දෙනවා.