Ako’y naudyok na magsulat nito upang makatulong na rin na maitama ang madalas na pagkakamali ng iilan sa pagsusulat gamit ang wikang Tagalog. Salamat kay boss @twotripleow na siyang nagsimula sa pag-post ng wastong paggamit ng ilan sa mga salita gaya na lamang ng NG at NANG, atbp.

Bagama’t hindi ako isang batikang manunulat, hayaan n’yo po akong ibahagi ang aking mga natutunan sa aking limang taong pagsusulat gamit ang wikang Tagalog.

Nauna ko na pong nailathala rito sa steemit ang wastong paggamit ng gitling. Ngayon naman, ibabahagi ko ang wastong paggamit ng dialogue tag at action tag. (Hindi ko po alam ang tagalog niyan. Sorry naman.)

DIALOGUE TAG AT ACTION TAG

---

Ano nga ba ang action tag at dialogue tag? Kailan nga ba ito gagamitin? Ano ang kaibahan ng dalawa.

Ang action tag at dialogue tag ay mga pariralang ginagamit at nilalagay bago, pakatapos, o sa gitna ng dayalogo. Iba rin ang bantas na ginagamit depende kung saan nakalagay ang action tag o dialogue tag.

Kaibahan ng dialogue tag at action tag:

---

DIALOGUE TAG

---

Ang dialogue tag ay ginagamit upang ipahiwatig na ang speaker ay nagsasalita. Ito ay inilalagay bago, pagkatapos o sa gitna ng script o salaysay.

Halimbawa ng dialogue tag:

sabi niya, sigaw niya, aniya, bulong nito, singhal ng nanay niya, atbp.

• Kuwit o comma ang gagamiting panghiwalay sa pagitan ng script at dialogue tag.
• Pero kung tandang pananong/question mark o tandang padamdam/exclamation point ang ginamit sa pagpapahayag ng tanong o damdamin, hindi na kailangang gumamit ng kuwit/comma.
• Ang unang letra ng salita pagkatapos ang script ay nasa maliit na titik o hindi dapat naka-capitalized, maliban na lang kung pangngalang pantangi o proper noun ang unang salita.

Halimbawa:

“Pahingi naman ako ng pizza pie,” sabi ni Jambol sa kaibigan.

“Walang forever!” singhal niya.

Sumigaw siya, “Itigil ang kasal!”

“Maghihiwalay rin kayo!” sambit niya bago bumuhos ang luha sa kaniyang mata. “Tandaan n’yo ‘yan!”

---

ACTION TAG

---

Habang ang action tag naman ay ginagamit upang ipahiwatig ang kilos ng speaker. Ito ay inilalagay bago, pagkatapos o sa gitna ng script o salaysay.

Halimbawa ng action tag:

Tumakbo siya, Inagaw niya ang bitbit ng babae, Ngumiti siya na parang aso, atbp.

• Tuldok o period ang gagamiting panghiwalay sa pagitan ng script at dialogue tag.
• Pero gaya ng dialogue tag, kung tandang pananong/question mark o tandang padamdam/exclamation point ang ginamit sa pagpapahayag ng tanong o damdamin, hindi na kailangang gumamit ng tuldok/period.
• Ang unang letra ng salita pagkatapos ang script ay nasa malaking titik o ito ay dapat na naka-capitalized.

Halimbawa:

“Sabi ko namang maghihiwalay rin kayo.” Ngumisi siya nang nakakaloko.

Sinampal niya ang larawan ng kaniyang nobyo. “How dare you?”

“Bakit ngayon ka lang?” Pinanlisikan siya nito ng mata at saka kumuha ng pamalo. “Sinabi ko namang umuwi ka nang maaga!”

---

Kung may maidaragdag pa kayong mga halimbawa o mas maayos na paliwanag, maaari po kayong magbigay ng komento para makatulong din sa iba.

Magpo-post din po ako tungkol sa tamang paggamit ng iba pang bantas, baybay, dialogue/action tags, at wastong salita na kadalasang namamali ng paggamit. Magpo-post agad ako kapag ang oras ko ay medyo maluwag-luwag na.

Kung may katanungan po kayo tungkol sa paksang ibinahagi ko ngayon, mag-iwan lang po ng komento at ito’y aking sasagutin.

Maraming salamat at mabuhay ang wikang Tagalog!

---

pinagkunan ng larawan:1

Maging bahagi sa pagpapalaganap ng wikang Filipino. Ikaw ba ay manunulat ng tula o maikling kuwento? O kaya ay nais malinang ang talento sa pagsusulat? Sumali sa mga patimpalak. I-follow ang @tagalogtrail para sa mga akdang Filipino at sumali rin sa aming talakayan sa discord: Tropa ni Toto