Haba Tan Asoe

Cukis

Ta peu phoun haba deungon nan Allah
Supaya teugah dari buet mara
Hudep teuh seunang jioh bak susah
Buet teuh beu sah ridha rabbana

Teuma 'oh lheuh nyan seulaweuet bek tuwo
Beu ta peusampoe keu janjongan Nabi
Sidroe insani paleng ta pujoe
Lam tiep-tiep uroe ta ba lam doa

Kalimah seujahtra keu mandum ahlul beit
Nyang han tom teupet bak bantu agama
Keu sekalian sahabat beuna chit ta niet
Meunan geu wasiet oleh maulana

Lheuh nyan saleum keu guree mandum
Nyang ka geu peu thee hukom agama
Sinan ta turi hukom nyang santun
Haleue ngon hareuem geupeuturi bawa

Cukis

Tabek nyang lambong rakan steemian
Inong ngon agam ban sigom donya
Nyang ubiet ngon rayeuk bek peusiblah bhan
Meunan hai rakan syarat meu syedara

Nibak malam nyoe haba tan panyang
Saweueb lon tuwan goh na ceurita
Hoe nyang long kalon bahan tan reupang
Ka lagee musang seutot manok dara

Lon jak u laot bakat that simbhan
Takot lon karam dibineh pasi
Lon jak u keudee tan meupat timphan
Nyang ramee chit awak meukat keu waki

Doidi kudoda idang
Seulayang blang ka putoh taloe
Daripada haba jeut keu prang
Ulon akhiri 'oh noe keuh sampoe