Hikayat Muda Seudang, Pt. 38; Meujangeun

SEUNAMBONG CEURITA

Kiban keuh naseb lon hai bungong mancang
Seunang ngon cut bang ka gob po jeumba
Pakon han lon turi sigohlom geumeutunang
Watee han timang nyoe ban takalon rupa

Patah hai cabeueng ka durouh bungong
Bungong meusipreuek ateueh rhueng donya
Alahai hatee ka bateueng di intan payoung
Gadoh bak peunaloung hana pat mita

Meuseupo sidara ngon hatee bingong
Rihoun ka keunong chit dikeu mata
Kiban ta meukra meunyoe ka keunong
Mumang si bungong gaseh han nyata

Muda lalee peutimang taloe si lantang
Mangat pah timang bak bahue geureubak
Bek rhet dilikout si bungong keumang
Na can jeut keu prang keumong bak talak

Guda geubahue ngon beuleuheun leuheun
Sambee meujangeun syarat peuneuwoe
Bak nyum meukarat sang han pat peutheun
Sabee meubayeuen indah cut putroe

Dara dilikout jangeun meugeuriwang
Meusangkout pandang gaseh dimata
Meubalek ngon rihoun Muda Seudang
Angan geulayang keu bungsu permata

Dudoe geumusu di Muda Seudang
Mantong keuh panyang ra-ueh kira
Teukeujout si aini geukalon rijang
Ka lewat hai cut bang payah ta gisa

Hireun lon tuwan keu gata hai aini
Kijeut han meukri rumoh apa baka
Malee that aini muka ka mirah hi
Teungeuet keu dali taki si muda

Kukang geutarek peubalek guda
Arah meugisa kiban kheun si aini
'Oh ban trouh bak rumoh apa baka
Langsong beulanja hana basa basi

Izin pih geulakee bak apa baka
U rumoh geugisa geureubak ka punoh
Bagah meusunoh kalheueh beulanja
Sayang si dara hatee ka mehmoh

Bak teungoh woe tanyong si Muda
Hai aini dara pajan meunikah
Lusa si saudah ka lam acara
Peukeuh di gata kana nyang ceudah

Leupah teukeujout nyak aini dara
Hana geusangka di tanyong meunan
Alahai cut bang bek nyan ta kira
Malee han teukira ateueh haba nyan

Pakon keuh malee hai adoe meutuwah
Gata that ceudah hai bungong jeumpa
Watee lon kalon ta duek ngon saudah
Teuntee brat ceudah lom wajah gata

Panee na meunan hai cut bang Muda
Meunyoe lon rasa saban nibak hi
Teumalee si dara jikheuen lagak rupa
Peu lom bang muda haba peurawi

Teuma kak aisyah kiban keuh lagak
Kiban meusigak meutamse putri
Teuntee meunyoe han cut bang han galak
Sampoe ueh tapak bak seutot keunari

Hana geuseu-out di Muda Seudang
Jalan geupandang sang deuh u gampong
Teuingat nyak muda keu ayeum bintang
Rihoun han leukang keu sikrak bungong

Aini ji peurati ie muka nyak Muda
Jibayang keunira lagak cut putroe
Pasti that tari po bungsu dara
Sampoe bang Muda rela merantoe

MEUSAMBONG

Bek tuwoe neubaca chit ata awai mangat meuho uram ngon ikue;

• Bhah lhee plouh tujoh Cemburu
• Bhah lhee plouh nan Rumoh Mawa 5
• Bhah lhee plouh limong Rumoh Mawa 4
• Bhah lhee plouh peut Rumoh Mawa 3
• Bhah lhee plouh lhee Rumoh Mawa 2
• Bhah lhee plouh dua Rumoh Mawa
• Bhah lhee plouh sa U Tingkeum Manyang
• Bhah lhee plouh Lam Perjalanan 3
• Bhah dua plouh sikureueng Lam Perjalanan 2
• Bhah dua plouh lapan Lam Perjalanan
• Bhah dua plouh tujoh Ulang Kisah
• Bhah dua plouh nam Bak Cut Ti Hayat
• Bhah dua plouh limong Meupisah
• Bhah dua plouh peuet Ziarah Kubu
• Bhah dua plouh lhee Jak Ziarah
• Bhah dua plouh dua Sahabat Pang Juhang
• Bhah dua plouh sa Han Sep Beulanja
• Bhah dua plouh Jak Bloe Guda
• Bhah sikureueng blah Langkah Phoun
• Bhah lapan blah Ie Mata Bungsu
• Bhah tujoh blah Meurumpok Ngon Guree
• Bhah nam blah Jangeuen Asmara
• Bhah limong blah Reuncana Keulana
• Bhah peut blah Nanggroe Ujong Utara
• Bhah lhee blah Tujoh Uroe Tujoh Malam
• Bhah dua blah Nasehat Poma
• Bhah siblah Senue
• Bhah Siploh Keunari Tujoh Rupa
• Bhah sikureueng Syarat Nikah
• Bhah lapan Haba Bahgia
• Bhah tujoh Aneuek Bungsu
• Bhah nam Mula Inti Ceurita
• Bhah limong Masa Abege Dua
• Bhah peuet Masa Abege Sa
• Bhah lhee Muda Lam Ayon
• Bhah dua Awai Phoun Mula
• Bhah sa Muqaddimah