Ikatlong edisyon na po ng TagalogSerye ng @tagalogtrail. Medyo na-bully ako ni Toto na sumali this week kahit ginusto ko muna magbreak 😪 Gayunpaman, ikinatuwa ko na rin magsulat para sa linggong ito dahil sa temang misteryo. Gagamitin ko na rin ang pagkakataong ito para bigyan ng karugtong ang kuwento nila Shiela, Dana at Edward. At syempre dahil paborito ni Toto si Moira, meron na naman ulit ngayong linggo 😋

Dahil sa nagrereklamo na si Toto at Junjun kung bakit wala pa rin title ang mga kwento, lalagyan ko na po, kahit parang medyo korni ang pamagat ko. hehe

Paliparin ang Paruparo

_{Unang Bahagi}

_{imahe galing unsplash.com}

🎶”Tagu-taguan, maliwanag ang buwan,
Masarap magmahal pag hindi iniwan … 🎵

Kumawala ang magandgang himig dahil sa pagkakalas ng earphone sa kinabitang cellphone.

Himalang kaunting lamat lamang sa screen ang tinamo nito at gumagana pa rin sa kabila ng pagkakabagsak mula sa halos limangpung talampakan na taas. Hindi nga lang ganoon kapalad ang may-ari: naliligo sa pula at baliko ang kanang braso, kung may hininga ma'y marahil paupos na rin ito.

Dalawang lalaki ang matatanaw na nakatayo sa tuktok ng tulay, nasa bingit at nakatingin sa kaawa-awang dalagang nahulog. Ang isa'y tila bang walang ekspresyon. Kung hihimayin ang bawat kibot ng mata't bibig ay marahil makakakita ka ng kaunting bahid ng pagsisisi. Sa isa naman ay luhang umaagos ng walang patid. Sa gitna ng hinagpis, isang panalangin at pangalan ang kanyang nasambit ...

"Dana ..."

🎶”Pagbilang mong tatlo,
Nakatago na ako … 🎵

Isa.

Dalawa.

......... nɒɒɿɒʞɒn ɒƨ oʞɒ ʞilɒdI

Tanghaling tapat ngunit hindi gaanong ramdam ang init dahil sa makapal at makulimlim na mga ulap. Ngunit walang unos ang darating ngayong gabi ... ang unos na nagbabadya ay hindi sa literal na kahulugan.

"Nakakunot na naman noo mo", bigkas ni Dana sabay siko sa mas nakakatangkad na kababata. "Hindi naman ganun kainit ... teka, payong? Gusto mo magpayong tayo?" Hindi na rin naghintay ng sagot ang dalaga at nilabas na lang sa bag ang kanyang pink na payong.

"Hindi naman dahil sa mainit.", nakisamangot na inabot ng binata ang payong ngunit para ibalik lang sa bag ni Dana. "Alam mo naman kung bakit diba? Sabi ko wag na tayo tumuloy ngayon."

"Aba, Isagani!" Medyo naalarma si Dana dahil baka kung ano ang madampot neto sa kanyang bag.

"Bag mo?! Pektusan kita jan. Tsaka alam mo namang hindi tayo pwedeng hindi pumunta ngayon. Kailangan natin 'tong gawin para kay Shiela at Edward", paalala ni Dana na may halong matinding lungkot sa dulo.

"Lakas talaga ng topak mo. Ang hindi ko talaga maintindihan ay kung bakit ang init ng dugo mo ngayon kay Edward, dati sobrang close naman kayo. Ilag kami nuon sa kanya dahil sa estado nya, pero kayo? Hindi nga kayo mapaghiwalay nun bata pa kayo, araw-araw kang andun sa bahay nila - first bromance!", tuloy tuloy na lintanya ni Dana na walang preno as usual.

"Hayyyy... alam ko namang something to do with Shiela to, simula nung -", pinatigil ni Isagani si Dana sa kakasalita gamit ang isang Oppa moment, pero sa halip na isang hintuturo ang idinampi nya sa mga labi ng dalaga ay isang buong palad ang isinakmal nya dito para tumahimik.

Gumanti naman si Dana gamit ang isang malutong na sampal sa kaibigan.

Nauso na sa magkaibigan ang ganitong kumportableng, at minsan ay mapanakit, na harutan simula pa ng mga bata sila. Naging hobby na nga ata ni Dana na sampalin at konyatan si Shiela at Isagani, ngunit mas lalo na sa kanyang Bessy dahil sa palagi nya itong kasama. Minsan ng napalayo si Isagani sa mga kababata ng mag-aral sya abroad, na syang naging daan upang maging kaibigan nito si Edward.

Ang kwelang bugbugan ay biglang naputol sa pagdating ng bisitang kanilang inaasahan. Lamang na sana si Dana dahil nahuli na nya sa Twister Lock itong si Isagani, pero agad nya itong pinakawalan nang makita nyang parating na si Edward. Dali daling tumayo at nag-ayos ang dalawa.

Biglang naiba ang timpla ng hangin. Isang dipa ang layo ng bagong dating kina Isagani at Dana ngunit parang isang milya ang layo ng kanilang mga pusong bigla na lang ginapos ng pangungulila.

Halso alas-tres na ng makakain sila ng tanghalian. Medyo malayo pa kasi ang binyahe nila para makarating sa kainang pinalano nilang puntahan. Marami naman silang nadaanang ibang kainan ngunit wala ni isa sa kanilang tatlo ang nagpadala sa gutom.

"Ito ang paborito namin dito. Lechong kawali na kare-kare. Tapos syempre pang-group meal na pang limang tao kahit dalawa lang kaming kakain. Tapos dadagdagan pa namin iyan ng tatlong extra rice."

Matapos mabusog ay naglakad naman sila sa parke sa di kalayuan. Nakakapagtakang wala masyadong naglalarong mga kabataan ngayon na parang sinadya upang bigyan ang magkakaibigan ng ilang sandali upang ariin ang lugar.

"Madalas kami dito kahit na nung naging busy na sa kolehiyo. Inaabangan namin dito si Mang Tolits, yung magtataho, na madalas tumambay ng ganitong oras. Mas marami kasing arnival ang nilalagay nya tuwing pauwi na sya."

"Speaking of the taho, ayan na sya. Teka bili lang ako ng tatlo para sa atin.", sabay aktong tayo ni Shiela pero biglang tumigil at napangiti ng bahagya sa dalawang binata. "... apat pala, hindi pala tatlo."

Nagpalipas ng oras ang tatlo sa kwentuhan. Mabilis na naubos ang merienda nila ngunit hawak pa rin ni Edward ang isang basong puno ng taho na may makapal na arnival. Papunta sila sa medyo tagong tambayan ni Dana at Shiela.

Gaya ng dati, si Dana pa rin ang bangka sa kadaldalan. Ang paksa'y mga magagandang alalala ng kanilang kabataan. Napapangiti at napapakwento rin ang dalawang binata ngunit halatang may malalim na iniisip ang dalawa.

"Grabe, ako lang talaga naguubos ng laway ano?", reklamo ni Dana sa dalawa. "Ay, teka alas-sais na pala, matawagan nga si tita bago mag-alala. Punta lang ako sa bandang bukana."

Makalipas ang ilang segundo'y lumisan na din ang panandaliang kapayapaan sa pagalis ng dalaga. Ang tensyong namumuo sa pagitan ng dalawa ay bigla na lamang umakyat, akmang sasabog. Sabay na tumayo ang dalawa't naglakad palayo sa kabilang direksyon ni Dana. Mayamaya'y nagsimula ng magtalo ang dalawa sa ibabaw ng isang tulay malapit sa isang abandunadong dam.

"%#$%, anong plano mo?! Bakit ka ba andito, ha?"

"$#$% mo rin! Alam ko yung plano mo! Talagang idadamay mo pa si Dana?"

"Ang kitid talaga ng utak mo! Wala ng pag-asa, ito na lang! ... Kung meron ba namang bang ibang paraan ... Kung pwede nga lang sana na ikaw na lang ang malagay sa alanganin ... baka hindi na ko nagdalawang-isip."

Sapak ang isinagot ng isang binata. Na sya rin namang ginantihan ng tadyak ng kabilang panig. Kung dati ay magpaglarong harutan, ngayo'y dugo ang hanap ng bawat birada. Maliksing nagpalitan ng ganti ang magkaibigan at hindi masabi kung sino ang nakakalamang. Patas sila sa pisakal na lakas. At magkaiba man ang kanilang kakayahang hindi pang-tao, nasa parehas na lebel pa rin sila maski dito.

Puno na ng galos ang dalawa nang matagpuan sila ni Dana. Nakalayo man ng husto ang dalawang binata'y hindi nila alam na may GPS tracker na nilagay si Dana kay Isagani habang naka-submission lock ito kanina. Simula ng pagkawala ni Shiela'y naging paranoid na ang dalaga at madalas na itong nagiiwan ng tracker sa mga kaibiga't mahal sa buhay. Mabilisang tinanggal ni Dana ang earphones na nakasukbit sa tenga at lumapit sa dalawa upang umawat.

Ang kahindik-hindik na tagpong ito ay pamilyar na sa dalawang lalaki. Wari ba'y isang puzzle na unti-unting nabubuo. Ilang piyesa na lang ang kulang at mabubuo na ang malagim na larawan - isang babaeng duguan at wasak sa ilalim na tulay. Ilang hakbang na lang ni Dana'y masasakatuparan na ang tagpong ilang beses ng naulit.

At bago pa man mangyari ang mangyayari, huminga ng malalim ang isa sa mga binata at inipon ang natitirang lakas para sa isang orasyon.

Tatanggalin ko ang lihim na kandado. Sumpa! Isang pagaspas.
Palayain ang alagad sa gapos ng oras! Sampung bagsak ng agos ....
......... nɒɒɿɒʞɒn ɒƨ oʞɒ ʞilɒdI

... ʎoๅnʇnʇI

Bilang ng salita: ~1250

Tema: Misteryo

Mga Karakter

Bida: Ang Haunted Hero: Hero na may malagim na nakaraaan (Edward o Isagani?)

Kontrabida: Ang Corrupted Hero: Nagsimula na mabait pero naging masama (Edward o Isagani?)

Elemento sa Kwento na ginamit:

• Time Machine (o time travel)

• Libro

• Pakpak (butterfly effect? pwede na ba? hehe)
  

  

• Sino ba sa dalawang binata ang totoong may mapanganib na layon? At ano ang detalye ng balak na iyon?

• Ano ang nangyari kay Shiela? At kailangan ba talaga ng writer na idugsong ang kwentong ito sa nakaraanag kwento?

Ipinapasa ko na po ang kwento at ang kapalaran ng mga karakter kay lodi @johnpd. Ikaw na bahala, lodi!

IKALAWANG PANGKAT:
@ailyndelmonte - Martes
@jazzhero - Miyerkules
@johnpd - Huwebes
@cheche016 - Biyernes

Tatapusin ko po ang unang bahagi ng kwento sa pag-share ng awit na nagamit sa kwento. Syempre, special mention si @tagalogtrail dahil peyborit nya si Moira.