Sevginin yeni ünvanı.

Sənətimdən dolayı uşaqlarla və gənclərlə çox sıx təmasda oluram. Gözümün qarşısında böyüyürlər, dəyişilirlər. Görkəmləri dəyişilir, düşüncələri dəyişilir, maraqları bir başqa cür olur.

Bəzən qəbul eləməyimiz çox çətin olur. Guya indiki uşaqların daha çətin tərbiyə olunduğunu düşünürük. Amma bir az da yaddaşımızda qurcalansaq heç nəyin dəyişmədiyinin fərqinə varırıq. Dəyişən formadır. Hər şey olduğu kimidir. Məsələn, " o vaxtkı" uşaqlar da artıq 13-14 yaşlarında ilk məhəbbətlərini kəşf edirdilər. Düzdü, o vaxt sevgi məktubları kağızlara yazılardı, xəlvətcə çantaya qoyulardı. Ya da bir rəfiqə olardı və ya bir dost. Məktub ötürən rolunu ifa edən. Bu dost ya rəfiqə o zamanlarda da bəzən naxələf çıxardı. Ya məktubun məzmunu dəyişilərdi, ya da doğru ünvanı bulmazdı o məktublar. İndi nə var?

İndi internetlə yazışma şəbəkələri var. Artıq dost və ya rəfiqə ikinci plandadı. Amma bu təzə sevgi nağıllarının da bir yekə " cadısı" var. Küpəgirən qarı da deyə bilərsiniz. O cadının adı screenlərdi. Bir öfkə anında , bir duyğulanıb kiməsə ürəyini açanda çox ehtiyatlı olmalısan. Sonra şantaj, xəyanət olayı ilə üzbəüz qalmayasan. Hələ sosial şəbəkələrin yüz fırıldağından baş çıxarmaq var. Küsmə, incimə səbəbləri də başqalaşıb. İnsanlar nəhəng bir virtual girdabın içindədirlər. Uşaqlara qadağan da edə bilmirsən. Çünki özün də bu girdabın içindəsən.

Nəysə, Allah axırımızı xeyir eləsin :)