Beungöh Aleuhat di Blang Padang
Lam saboh saheh hikayat, na geupeugah Blang Padang nyan na keuh tanöh wakaf sidroe raja Aceh Sultan Jamaloi keu Meuseujid Raya Baiturrahman. Teuma uroe nyoe, alèh kiban cara tanöh nyan bak sang ka lam jaroe teuntra. Man digeutanyoe nyang hana that meuphôm urosan-urosan nanggroe, cit la'eh that bak tak pakoe hai-hai lagè nyan, seulaén ta qasad lam hatée tanöh nyan kon atra teuntra.
ADAK PIH LAGEE NYAN BAGOE, jeut ta peugah 'an lawet nyoe, Blang Padang mantong jeut geu pakek lé ureueng ramèe. Tiep uroe teumpat nyoe ramèe ureueng. Peu lom bak uroe aleuhat, beungöh atawa supôt. Meunyo beungöh uroe aleuhat, Blang Padang peureuseh uroe meugang. Dum ureueng meu rôn-rôn keunan, geujak plueng-plueng beungöh. Aneuk dara, ma sinyak, yah sinyak, aneuk miet cut-cut, ureueng tuha nyang ka atok-atok, meu sapat dum di Blang Padang 'oh beungöh aleuhat.
Mandum di sinan na nyang seukada jak plueng-plueng beungöh, na nyang cuma geu jak-jak keudroe, meutapi ramèe cit nyang mukat. Na nyang mukat ija, bajee, kuweh, sampe ureueng mukat boh sikumbong na. Di aneuk agam, peu keuh nyang lajang-lajang atawa kajeut keu yah sinyak, ramee cit nyang jak plueng-plueng beungöh. Peu keuh beutoi dijak plueng-plueng keu sihat tuboh atawa na meukeusud laen, nyan hana pat takira.
Pokok jih miseue digata hana meuho jak 'oh beungöh aleuhat. Jeut neujak u Blang Padang. Meu macam bagoe ureueng na di sinan, soe teu'öh miseue gata mantong lajang meureumpok calon peureumoh sinan. Saweueb aneuk dara pih geuthat jai, ngon meubagoe rupa, meubagoe gaya.
Tinggai neu peutoe mantong, neu pakat peugah haba, neu meuturi, neu lakee lumboi hape, lheueh nyan olah laju sampee ditem watee neu pakat meukawen. Meutapi bah urosan nyan, bek sampe salah pakat. Bek sampe rhoh neu perli dara nyang na lakoe jih sajan. Saweueb le cit ma sinyak nyang mantong hi aneuk dara nyang jak plueng-plueng beungöh aleuhat di Blang Padang.
Teuma kon cit keuneuk peugah peukara cakoe aneuk dara sinoe nyan urosan mudah that. Bek cit neukira sigoe jak u Blang Padang jeut neu peu sapat lumboi hape aneuk dara lagee cara SPG rukok lakee lumboi hape aneuk muda bak warong kupi. Kon lagee nyan. Urosan cakoe aneuk dara beungöh uroe, peu lom uroe aleuhat nyan hana sama lagee nyang biasa neu peulaku bak malam seulanyan. Man kiban cit? Allahurabbi. Troh bak tingkat nyan payah lon peugah di sinoe?
