這不是一個鬼故事 (四)

「早知就唔玩呢個大懲罰啦......真係撞鬼啦而家...」Aaron似乎亦相信Kitkat所說的鬼神論。

在前面的Linus和櫻木不發一聲，但從他們的臉色看來，他們心中亦有某程度的認同。

「床上面咪係阿Ken囉！」櫻木指着17號房中比較近房門的一張床說。

只見床上的青年赤裸着上身，下身只穿着一條短褲。由於臉深埋在枕頭中， Linus 一行人都看不到這青年的容貌。身形看起來和昨晚失蹤的Ken十分相似。Aaron和Kitkat一人一邊肩膀，雙手用力把青年拉了起來，青年全身無力的坐在床上，前額的頭髮把還是緊閉着的眼睛的上半部遮蓋着。兩邊嘴角各有一道水跡伸廷至下巴。Aaron跟Kitkat兩人接着大力搖晃仍未甦醒過的青年。而櫻木則不停重叫喚着：「Ken! Ken! 快趣啲起身，我地有事要問清楚你。」

就在櫻木重複了這句說話不知多少次之後，Linus 已經有點不耐煩「啪！啪！」Linus不由分說便大力的打了青年兩個耳光。每邊臉頰上清晰可見兩道紅色的手拳痕。可能是因為挨了打的關係，青年已經睜開了雙眼，用紅紅我雙眼望看前面，有氣冇力的道：「咩...事...」一陣酒味撲向眾人。

櫻木眉頭一皺，一手把青年拉了起來，再將他推出房門，吩咐他；「梳洗完即刻返黎！」

幾分鐘後，他回到房間裏來，在凌亂的床上找了一件Tee裇穿上，望着四人說：「到底發生咩事？」

這時候，Aaron和Kitkat 終於可以正眼望到他了。青年的高度和身形跟"Ken"十分接近，從後邊看的話真的有九成相似。兩人都是方形大眾臉，誇張一點的說，只見過一，兩次面的話，很大機會在一轉眼間便忘記他們的長相。

「佢就係我果組嘅阿Ken. 尋晚我十點幾返到黎hall,見到佢係樓梯前面嘅草叢搵緊野，我見佢醉得好緊要，咪去幫下佢手搵，結果都係搵唔到，咁我地就返咗房瞓啦。」

「緊係搵唔到野啦，你自己都醉哂啦！」Kitkat再次搶先發言。這一次，Aaron和Linus罕有地點頭讚同。「Anyway, 呢個阿Ken同尋晚我地見果個阿Ken真係有幾分相似，仲要一向係O'camp都冇咩出過聲，真係分唔到囉。係喎阿Ken,尋晚好似係有個女仔搵你，你就出咗去，之後好耐都唔見你返，我地咪出去搵你囉。結果咪搵到果個阿Ken囉。我地見佢又係拎住你地組件Tee,又拎個好似樣嘅銀包，咪認為一定係你，就捉咗佢返去囉...」

「你見到我個銀包同埋O'camp Tee?」Ken用他沒有個性的聲音問道。

「黑色真皮銀包嘛，咪尋晚果個阿Ken拎住囉！話時話，你有冇孖生兄弟？咩話？冇？咁尋晚果個又會咁似樣嘅？」Kitkat繼續口若懸河。「不過老實講，尋晚我地都冇咩留意果個阿Ken係點嘅樣。可能因為太過普通，而家印象都幾模糊。諗起就嬲，點解阿Ken咁嘅樣都有女，我咁靚仔就冇，公平咩？」

「收聲啦！」熟悉的對話，來自熟悉的人物，不同的是，現在的Aaron面色蒼白，聲音擅抖，似乎對鬼神之說不無恐懼。「問返啲正經野先啦。阿Ken, 點解你會出咗去一直都唔返？攪到我同Kitkat要去搵你，先至會撞到個隻野...」

「啫係咁......」Ken面有難色，欲言又止。

「我幫佢講啦，尋晚返黎之後我都問咗佢點解佢會十點幾會係草叢搵野...原來個死仔其中一個Ex搵佢，叫咩名呢，呀，趙甜。咪叫咗佢出去嘅...」

「點解搵佢呀？」Kitkat追問。

櫻木瞪了Kitkat一眼，似是怪責他打斷自己的說話：「呢層個死仔冇交代到。原來趙甜搵咗佢出去之後，佢地兩個去咗樓梯前面塊草地度坐...正確啲講係果度棵大樹下面坐。之後話傾偈喎...唔知點解傾傾下就變咗......NSFW......之後佢地就走返去趙甜同佢家姐一齊租嘅mini hall飲酒，飲飲下至發現唔見咗銀包同件O'Camp Tee，所以佢返咗去搵，不過搵唔到，仲俾我拉咗返房。」櫻木一邊講，Aaron同Kitkat亦一邊用既羨慕又不恥的眼神瞪著Ken。而Ken則是閃閃縮縮的，慢慢地退到櫻木身後，大概他亦看得出兩名血氣方剛，精力無處宣洩的野獸的危險性。

「條死仔原本仲話要返去人地mini度過夜，我緊係唔俾啦，嗱，唔好誤會我妒忌佢呀，我見佢醉成咁，怕佢危險呀！ 好在我捉咗佢返黎啫，唔係都冇辦法證明佢尋晚冇去到大懲罰啦，係唔係？咁你地都唔會知你地成班都撞鬼啦？」

話剛說罷，所有人都面色一沉。Linus亦如夢初醒,一把將Ken拉了過去，從頭到腳仔細打量一番。「呢啲咁嘅大眾臉真係通街都係，同尋晚個阿Ken都有幾分相似，難怪所有人都認差... 好喇，既然阿Ken係度，即係我地冇失蹤人口啦，咁我地都唔使再同U報告啦。大家快趣返去清理現場，當冇事發生過就算。真撞鬼又好，假撞鬼都好，尋晚嘅事就當冇發生過，知唔知？」

所有人都不住點頭。大家都覺得這是最好的解決方法。

「好，咁我地一齊返去幫手清理現場！」

「吓！重要返去？咁猛都仲要返去？」

「係囉，話唔埋佢地幾個已經清理好哂呢？唔返去得唔得呀？」Aaron同Kitkat罕有地意見一致。

「你地覺得啲血拳印咁快可以清理哂？唔想成件事揚哂出黎嘅就快啲返去幫手！日光日白使唔使咁驚鬼呀，舊年成年我地係果度都留過好幾個通宵啦，果陣仲有幾條屍係度，你地都未驚啦，而家咩都冇，使唔使驚成咁呀？」Linus用責難的口吻道。

Aaron反擊說：「就係連屍都冇先驚呀，仲唔真係撞鬼？」

Ken突然「呀」的一聲叫了出來，好像想起了什麼的。「咁多位師兄，我可唔可以走先呀？因為尋晚我原本應承咗會返去，但係就冇返到，我估佢地兩個醒咗唔見我會好擔心我，會周圍搵我，我要返去同佢地交代返先得。」

「你就想，成件事都係因你而起，唔係你走咗去NSFW,我地又點會撞鬼呀！哼，你一定要幫手攪返掂佢！」Linus 堅持Ken一定要去幫忙。Aaron和Kitkat不用等Linus的信號，就已經一人一邊的把Ken夾在中間，強行把Ken拖向教學樓的方向。

「但係趙甜佢地又點呀？」

「放心，我會幫你通知佢地架啦。你唔去搵佢地，佢地都識得黎呢度搵你架啦。我會話佢地知，你尋晚醉到返唔到去，係度瞓，咁OK啦。你地行先，我一陣就過黎幫手。」

「我地走啦。」Linus一馬當先，邁開大步，頭也不回的走了。

「走啦，Ken. 櫻木佢唔會黎架喇，佢出名最驚鬼嘅，上次聽咗個悶到瞓着嘅鬼故，佢都嚇到暈低。今次真係撞鬼，佢點夠膽黎呀。」Kitkat再一次擔當解說的角色。

「阿Ken,你唔好得罪你個組爸呀，佢表面上好似好friendly, 實際上係好粗暴架......佢上次......打到人學個鼻.........」

一行四人邊行邊說，不消一會兒就到了停屍房。

原本應該燈火通明的停屍間，現在是漆黑一片。Linus心感不妙，快步走入停屍間，其他人亦步亦趨，一起走了進去。黑暗中隱約見到三個人形物體伏在地上。Linus跑到最近門口的一個身邊，正想看個清楚，突然「嘭」的一聲，停屍間的門關上了。

連從門外透入來的些微光線都失去的眾人，頓時變成失明一樣。只聽到黑暗中傳來「伏」...「伏」...「伏」...「伏」...幾聲，世界又變成死寂。

第四回 - 完

---

圖片來源:1, [2], [3], [4], [5] Pixabay.

---

這不是一個鬼故事 (三)

這不是一個鬼故事 (二)

這不是一個鬼故事 (一)