2nd ODI of Sri Lanka vs Australia 🥳

ශ්‍රී ලංකාව සහ ඔස්ට්‍රේලියානු කණ්ඩායම අතර තරග පහකින් යුත් එක්දින තරගාවලියේ දෙවෙනි තරගය ඊයේ මහනුවර පල්ලේකැලේ ජාත්‍යන්තර ක්‍රිකට් ක්‍රීඩාංගනයේදි පැවැත්වුනා. ඒ අනුව තරගයේ කාසිය වාසිය දිනාගත් ඔස්ට්‍රේලියානු නායකයා ප්‍රථමයෙන් පන්දුවට පහර දීමට ශ්‍රී ලංකා කණ්ඩායමට ආරාධනා කලා. පාදයේ අබාධයක් නිසා ඊයේ තරගයේදි වනිදු හසරංග වෙනුවට ජෙෆ්රි වැන්ඩසේ ක්‍රීඩා කලා.

ඒ අනුව පිටියට පිවිසි ශ්‍රී ලංකා ආරම්භක පිතිකරු යුගලයට සාර්ථක වීමට ඉඩ නොදි කල්වේලා ඇතුවම ක්‍රීඩාගාරයට හරවා යැවීමට ඔස්ට්‍රේලියානු පන්දු යවන්නන් සමත්වුනා. තරගයේ 47 වෙනි පන්දුවාරයේදි තරගයට වර්ෂාවෙන් බාධා එල්ල වුනා. ඒ වන විට ශ්‍රි ලංකා කණ්ඩායම 220/9 ලබාගෙන සිටියා. ඒ අනුව ඩක්වත් ලුවිස් න්‍යායට අනුව ඔස්ට්‍රේලියානු කණ්ඩායමට පන්දුවාර 43කදි ලකුණු 216ක ඉලක්කයක් හිමිවුණා. පන්දුවට පහර දීමෙදි ශ්‍රී ලංකා කණ්ඩායම වෙනුවෙන් කුසල් මෙන්ඩිස් ලකුණු 36ක් සහ දසුන් ශානක ලකුණු 34ක් රැස්කිරිමට සමත් වුනා.

අනතුරුව පිටියට පිවිසි ඔස්ට්‍රේලියානු කණ්ඩායමේ පළමු කඩුළු දෙකම ලබාගැනිමට ධනංජය ඩි සිල්වා සමත් වුනා. ඉන් පසුව ඔස්ට්‍රේලියානු කණ්ඩායම ආක්‍රමණය කල ශ්‍රී ලංකා පන්දු යවන්නන් ඔවුන්ව ලකුණු 189කට සීමා කිරිමට සමත් වුනා. පන්දු යැවිමේදි ශ්‍රී ලංකා කණ්ඩායම වෙනුවෙන් චාමික කරුණාරත්නා කඩුළු 03, දුෂ්මන්ත චමීර, ධනංජය සහ වෙල්ලාලගේ අතරේ කඩුළු 02 බැගින් බෙදිගියා. කලින් තරගයේදී එක්දින වරම් හිමිකරගත් දුනිත් වෙල්ලාලගේ ඊයේ දිනයේදි තුන් ඉරියව්වෙන්ම දස්කම් දැක්වුවා. කඩුළු 03ක් සහ දක්ෂ දුවද්දි දැවීයාමක් ලබාගත් චාමික කරුණාරත්න ඊයේ තරගයේ වීරය සම්මානය හිමිකර ගත්තා.

ඒ අනුව තරග පහකින් සමන්විත එක්දින තරගාවලිය මේ වන විට තරග 1:1ක් ලෙස සමතත්වයේ පසුවෙනවා. මීළඟ තරග තුනම පැවැත්වෙන්නේ කොළඹ ආර්. ප්‍රේමදාස ක්‍රීඩාංගණයේදි. ලංකාවේ හැමෝම සතුටු වෙන්න හේතුවක් හොයන මේ කාලේ මේ විදිහට තරග දිනලා ලබාදෙන සතුට ගැන කියාගන්න වචන නෑ. ඊලග තරග 03ත් ජය ගැනිමට ශ්‍රී ලංකා කණ්ඩායමට අපි හදවතින්ම සුභ ප්‍රාර්ථනා කරමු. ❤️🥳