तुझ्या घरी मी येऊन गेले . पण आपली भेट झाली नाही . तू पुढचे तीन आठवडे सतत टूर वर असल्याचे कळले . त्यामुळे आता आपली भेट होणे कठीण आहे . म्हणून हे पत्र .

अर्थात व्हॉट्सअँप, फ़ेसबुक आणि मोबाईल यावर संपर्कात राहू हे नक्कीच ! ! !

मी मधेच तुला सांगितल्याप्रमाणे मी आता कायमची लंडनला जात आहे .आईला बरोबर घेऊन .

कायमचे घर सोडायचे म्हणून सगळी आवराआवर करत असताना जुन्या फोटोत तू , माधव आणि तुमचे सावंत सर ( माझे आजोबा ती .आप्पा ) अशा फोटोच्या २ कॉपी मिळाल्या. त्या तुझ्या घरी वहीनी कडे दिल्या आहेत....एक माधव साठी आणि दुसरी अर्थात तुझ्यासाठी . तुम्ही दोघे आप्पांचे अत्यंत लाडके विद्यार्थी ना ! ....नंतरच्या काळातले त्यांचे तरुण मित्र .

...हे फोटो वहिनीला दिले तेंव्हा तिला इतके भरून आले होते ना ...आणि मलाही ...एक तर आमच्या दोघींचे माहेरचे आडनाव एक ...आणि दुसरे म्हणजे तू आणि माधवचे आप्पांशी असलेले भावबंध ! ! !