#46 - Pantoen Aceh | Sastra Aceh
Aneuk cempala ateueh bak sukon
Ateueh bak lason na tulo dara
Mula phon haba Assalamu`alaikum
Wareh ngon kawoem bandum lon sapa
Toe bineh pasi meuriti aron
Kayee ijo on toe bineh rimba
Bacut meuhaba di dalam panton
Meu`ah keu ulon meunyo na gasa
Ureueng kulah bu laju geuchoet on
Ureueng seumabon ka geurah ija
Pakek sampiran karangan panton
Bareh ateueh phon peue laen rika
Di lhoekseumawe na PT. Aron.
Meugah lhok sukon bangunan kana.
Dua bareh yuep meukeusot alon
Peue tema panton sinan peunyata
Ateueh bak langsat ulat meu ayon
Meu ek ngon meutron angen peudoda
Nyo sastra Aceh bereh beu muphom
Pakiban panton cara meurika