Qadın olmaq

Əgər imkanım olsaydı, belə bir sorğu keçirərdim: dünyaya bir daha gəlsəydin qadın olmaq istərdin yoxsa kişi?
Düşünürəm ki, əksər qadınlar kişi olmaq istərdi.Əcaib deyilmi? Dünyaya qadın kimi gələn insanin belə bir şansı olsa kişi olmaq istəməsi.
Səbəbləri araşdıraqmı? Bəlkə bu səbəb düşüncəmizə oturmuş " mən kişiyəm, mənə olar" adlı çürük fəlsəfə ilə bağlıdır? Ya da " qadın ailənin namus bəkçisidir", yəni ailənin namusu qadının təmiz adı, nümunəvi davranışı ilə birbaşa bağlıdır- ehkamından irəli gəlir.Nümunəvi davranış nədir? Bu bir qızın ya qadının evdə, küçədə, məktəbdə və ünumiyyətlə hər yerdə başıaşağı gəzməsi, yad adam nə soruşsa ona cavab verməməsi, " mən belə istəyirəm" fikrində olmaması və çoxlu belə şeylər. Ailə qurduğu evdə günün 24 saatı həmin ailənin ən kiçiyindən tutmuş ən böyüyünə kimi hamının qulluğunda durması, dünyaya gətirdiyi övladların adının qoyulmasından tutmuş onların həyatlarının ən vacib qərarlarında ən sonuncu söz sahibi olması.
Doğrudur, son zamanlar çox yerdə, o cümlədən bizdə də qadın bir şəxsiyyət kimi cəmiyyətin həyatında iştirak edir.Amma yenə də çətindir qadın olmaq. Hələ də bir iş qadını olmaq. Evin kişisi ilə kandardan ayağını içəri qoysa da, yorğunluğunu bəlli etməyə nə vaxtı var, nə imkanı. Həmən saat mətbəxə keçməli, yemək hazırlamalı, uşaqların dərsləri ilə maraqlanmalı, yır- yığış etməli, üzündən təbəssümü əksik etməməli, yemək süfrəsinə hamıdan gec oturmalı, hamıdan tez qalxmalı, hamıdan sonra yatmalı, hamıdan tez durmalı. Və eyni zamanda özünə fikir verməli, baxımlı olmalı.
Çətindir, eləmi? Bəli, çətindir qadın olmaq.